Suomen Kuhmo-lidnas, Juminkeko-fondas avaižihe Vepsän kul’turan voz’.
Ezmäine kul’turan voden azjtego om fotoozuteluz, miččen fotoiden tegii om kirjutai da kul’turan tegii Markku Nieminen. Fotoozutelusen nimi om Vauktan unen süles.
— Vepsläižed da vepsän ma oma minun südäimes ezmäižes matkaspäi niidennoks. Vepsläižiden čomuden riža, käzitöiden mahtod, kožmusen taht da armastuz londusehe oma nene pirdad, miččed tariž nügüd’läižes elos, sanub fotoozutelusen tegii, Juminkeko-fondan pämez’ Markku Nieminen.
Ozuteluz starinoičeb vepsläižiš, niiden elos, kul’turas, arhitekturas da vepsän man londuzkuvas.
— Vauktan unen süles-fotoozutelusen abul minä tahtoižin ozutada suomalaižile tundmatomad heiden täht Vepsän mad. Ozutelusel om nel’l’ temad: vepsläižiden modkuvad, vepsän man londuzkuvad, vepsläižiden tegod da rahvahan tuleb aig, jatkab paginad Markku Nieminen.
Ozuteluz om avaitud keväz’kun lophusai.