Vepsän kel’ kului Ühthižvenälaižel konkursal
“Bohat rahvahan jäl’gestuz — minä navedin ičtemoi čomad kel’t ” -Ühthižvenälaižel konkursal kului vepsän kel’. Vižvozne Emilia Mal’uta Petroskoišpäi eziti ičeze sädandradod — videorolikan vepsän kelel. Konkurs tehtihe “Kel’kazvatuz kanzas — Venäman rahvahiden keliden kaičendan da kehitoitandan aluz” -foruman aigan, kus Emilia tegihe-ki konkursan laureataks. Konkursan finalas hän lugi Nina Zaicevan “Kodimal”-runon vepsän kelel.
— Vägestajiden keskes om vižvozne Emilia Mal’uta. Hän om Šokšun keskškolan pämehen da “Vepsän kul’tursebran” ühtnikan Nina Nikolajevna Koren’kovan vunuk. Emilia čudutoiti žürijoukud ičeze videorolikal da ezini konkursan lopetapas Moskvas, sanub Änižröunan rajonan administracijan press-služb.
Konkursaha ühtni 667 školiden norembiden klassoiden openikad da päivkodin kazvanikad enamba mi 45 Venäman regionaspäi. Ühtnikad ezitiba sädandradod, miččed ozutaba armastust kodikel’he da arvostandad rahvahiden kul’turtradicijoihe. Žürijouk arvosteli kaik radod da valiči konkursan 20 laureatad.
