Venehjärves pietäh Vezirengahat-etnofestivuali
Vahnas karjalazes Venehjärven kyläs pietäh etnofestivuali ”Vezirengahat”. Varua sen pidämizeh suadih Tvorčestvo regionov -grantukilvas.
Elokuun 9. päivänny Venehjärveh kučutah kaikkii, ket tahtotah tiijustua karjalazien perindölöih da neroloih nähte, kuduat ollah kalastukses kiini. Paiči sidä festivualih tulluot suajah oppie karjalazien perindöllizii kalasyömizii.
— Festivualis olles suau nähtä, kui mennyh rodieu nygözekse. Festivualin rahvahale taričemmo ruadopajoi, perindöllisty muuzikua, käzineruo, sanoi Oma Mediale projektan piälikkö Julija Filippova.
Festivualin pidämizen mieli juohtui piäh paikallizile eläjile Lesozien molodoloile — Santerile da Ninale. Hyö ollah Venehjärven kaiččijat. Projektan konsul’tantoinnu oldih Oma Mua -lehten toimittai Uljana Tikkanen da Kostamuksen rauhoitetun alovehen spetsialistat.
— Mindäh panimmo festivualile moizen nimen — Vezirengahat. Konzu vedeh lykkiät kyvyzen, sen kirvottuu vien piäle roitah rengahat, joga toine suurembi ennisty. Mugai ristikanzan elijas, konzu häi perehtyy, hänel rodieu lastu da lapsil rodieu lastu — pereh, sugu kazvau da levenöy, sellitti Julija Filippova.
Hyvyönluadii fondu ”Pohjazen hyvys” omassah kilbah ”Tvorčestvo regionov” vuvvennu 2025 otti vastah 99 projektua Ven’an 14 subjektas. Työttylöis projektois 35 suadih den’gutugie. Niilöis luvus on 8 projektua, kuduat työttih Kostamuksen linnan alovehelpäi.
Fesitvualin pidämizeh sežo suajah abuu Severstal’-laitoksespäi.
Aihies voit lugie suomeksegi.
