Venäman rahvahiden lugetišhe voib putta “Gosuslugi”-portalan abul
Venäman Rahvahiden kosketusiden federaline agentstv vaumišti “Gosuslugi”-portalan täht eriližen pakičuzforman, mittušt voib kävutada ristituid, kudambad tahtoiba oficialižesti putta Venäman igähižiden vähäluguižiden rahvahiden lugetišhe. Aigemba mugoine holitez tehtihe “Moi Dokumenti” -keskuses, no voden 2024 heinkuspäi sigä ei otkoi uzid pakičusid.
Nece uz’ elektronine holitez abutab ristituile ližata tedoid icešaze Venäman igähižiden vähäluguižiden rahvahiden ezitajiden lugetišhe, vajehtada vai heitta miččid-se tedoid, a mugažo koheta vigoid da painandvigoid jo sadud tedotuses.
— Oigeta pakičust voiba 14-voččed da vanhembad Venäman rahvanikad, kudambad oma Venäman igähižiden vähäluguižiden rahvahiden ezitajad, da vähäluguižiden rahvahiden sebrad (mugoižile sebroile tariž olda oficialižesti registriruidud), tedotab Venäman Pohjoižen, Sibirin da Edahaižen Päivnouzmpolen igähižiden vähäluguižiden rahvahiden associacii ičeze VKontakte-gruppan lehtpolel.
Igähižiden vähäluguižiden rahvahiden sebran pämez’ vai radnik voib oigeta pakičuz sebran toižen ühtnikan polespäi. Pämehele tariž vaiše sada kirjaline laskend sebran ühtnikalpäi. Pakičusen täht tariž kävutada erilišt vahvištoittud elektroništ allekirjutust.
Johtutam, miše Venäman igähižiden vähäluguižiden rahvahiden lugetišen idei om Grigorii Ledkovan, kudamb om Venäman Pohjoižen, Sibirin da Edahaižen Päivnouzmpolen igähižiden vähäluguižiden rahvahiden associacijan prezident. Elektronižen lugetišen projektan vaumišti Venäman Rahvahiden kosketusiden federaline agentstv.
