Venäman Pohjoižen tradicionališt kul’turad diskutiruidas Petroskoiš
12.—15. sügüz’kud Karjalas mäneb IX Ühthižvenälaine ”R’abininoiden lugendad”-konferencii, miččel pagištas Venäman Pohjoižen tradicionaližes kul’turas.
Konferencijan radho ühtneba 200 oppijad Venäman 20 agjoišpäi. Nene oma etnologad, arheografad, lingvistad, istorijan, etnomuzikan, puižen arhitekturan da rahvahan kul’turan tundijad i mugažo opendajad da muzejiden radnikad.
— Enamba rahvast tuleb Moskvaspäi, Piterišpäi, mugažo Velikii Novgorodaspäi, Permišpäi, Siktivkaraspäi, Orenburgaspäi da toižiš lidnoišpäi. Rad mäneb ühesas sekcijas. Karjalan tedomehed ezitaba dokladoid karjalaižiden da vepsläižiden etnografijas da istorijas, sanub Baltianmeren suomalaižiden rahvahiden ligan pämez’ Anna Anhimova.
Täl vodel konferencii pidetas Ligan ”Openduz — tedod: kehitoitusen platform”-projektan aigan Karjalan pämehen grantoiden fondan raha-abul.
”R’abininoiden lugendad”-konferencii tehtas kerdan nelläs vodes ”Kiži”-muzejan iniciativan mödhe. Konferencijale anttihe mugoine nimi Kižin volostin tozistarinoiden starinoičijoiden R’abininoiden dinastijan arvostandan znamaks.
Tärktemba programmanke voib tundištadas tägä.
