Venäjän presidentti myönti Karjalan tietomiehellä Kunnivon arvomerkin
Venäjän federatijon presidentti Vladimir Putin allakirjutti käšyn myöntämiseštä Kunnivon arvomerkki Jevgenii Pavlovič Ieškolla — biologijan tohtorilla, elukkojen ta kašvien parasitologijan laboratorijan johtavalla vanhemmalla tutkijalla Karjalan tietokeškukšen biologijan instituutissa, parasitologija-erikoisalan šekä ekologijan ja eläintiijon professorilla Petroskoin valtijonyliopistošša.
Tietomieš palkittih korkiella kunnivomerkillä hänen panokšešta tiijon kehittämiseh ta pitkäaikasešta anšijokkahašta työštä. Jevgenii Pavlovič omisti yli 50 vuotta tietotyöllä, johti parasitologijan laboratorijua vuosina 1987—2018, toimi ekologisen parasitologijan tietokoulukunnan johtajana, on yli 300 tietotyön kirjuttaja tahi toini luatija šekä monien tutkimušprojektien johtaja. Hänen joholla on valmissettu yhekšän väitöškirjua.
— Jevgenii Ieško on kuin kotimualla, niin ni ulkomailla arvoššettu tutkija ekologisen parasitologijan alalla. Hänen tutkimukšet luotih peruštan nykyaikasella käsitykšellä parasiittipopul’atijojen muuvvoštamisešta ta niijen roolista ekosistemilöissä. Hänen panoš ihmisen toiminnan vaikutukšen, biologisien invasijojen ta vierašlajien tutkimiseh on keškeistä ekologisen turvallisuon kannalta, kerrottih Karjalan tašavallan piämiehen lehistöpalvelušša.
Aikasemmin tietomiehellä myönnettih arvonimet “Karjalan tašavallan ansijoitunut tietoruataja”, “Karjalan tašavallan palkinnon šuaja”, "Venäjän federatijon ansijoitunut tietoruataja” šekä metali “Anšijoista Karjalan tašavallalla”.
