Uuzi opastunduvuozi algavui Veškelyksen školas. Tänävuon Veškelyksen školas rodih kolme enzimäzen kluasan opastujua. Kai opastujat ruvetah opastumah karjalua.
— Kaikkiedah školas opastuu 30 lastu. Kai lapset opastutah karjalua enzimäzes kluasas algajen, sanoi karjalan kielen opastai Oksana Serebr’annikova.
On mainittavu, ku Veškelys on Suojärven piirin ainavo kylä, kus opastetah karjalan kieldy. Vuozi vuottu opastujien miäry vähenöy. Paikallizien eläjien sanoin mugah, nuoret ei kiännytä kyläh ruavon hädiä Petroskois opastundan jälles.