Valičused 2026: Karjalas voib änestada internetas-ki
Necen voden sügüz’valičusil Karjalan eläjad voiba änestada internetas, siš tedotab Karjalan änestuzlaudkund ičeze lehtpolel.
— Venäman keskuzänestuzlaudkundan pätusen mödhe Karjala putui mugoižiden regionoiden lugetišhe, miččiš valičusiden päivän radaškandeb online-änestamižen sistem, sanutas laudkundas.
“TASS”-portalal tedotadas, miše sügüz’valičusil internetänestuz tehtas Venäman 33 regionas, mi om kaikid enamb lugumär sisteman radon augotišespäi.
— Edeližen kerdan kaikid enamb mugoižiden regionoiden lugumär oli prezidentvaličusil vodel 2024. Siloi internetänestust kävutadihe 29 Venäman regionas, sanutas portalal.
Karjalas online-änestamižen sistemad kävutadas vodelpäi 2023.
Voden 2026 sügüz’valičusil Karjalas valitas Venäman Duman da valdkundan Zakonoiden tegendan kundan radnikoid. Sen ližaks Petroskoiš valitas lidnan valdmehid.
Venäman keskuzänestuzlaudkundas pättihe, miše necen voden sügüz’valičused tehtas koumepäiväižikš. Ned mäneba 18., 19. da 20. sügüz’kud.
— Koumepäiväine änestuz andab enamba voimusid änestajile. Kaiken ližaks nece abutab tehta valičused varumatomambikš kaikiden änestajiden täht, mi om ani tärged nügüdläižen aigan, kommentirui Venäman keskuzänestuzlaudkundan pämez’ Ella Pamfilova laudkundan oficialižel VKontakte-lehtpolel.
Miše ühtneda online-anestamižehe, tariž 3. elokud — 14. sügüz’kud jätta pakičuz gosuslugi.ru-portalale.
Voimuz änestada internetas ei znamoiče, miše nece om üksjaine anestamižen form. Sügüz’valičusil Karjalan änestai voib iče pätta, kut hän änestab — specialižel sijal vai internetan abul.
Uzišt neciš temas voib lugeda mugažo suomeks.
Tarkištele “Oma Median” MAX-kanalad!
