Vägestuz Hanti-Mansiiskas: “Sanu, luge, kirjuta!” – parahim abuopenduzkirj

Neche kirjaha om pandud sur’ armastuz vepsän kel’he, äivoččen radon mahtišt, taht antta kel’t lapsile. 6+ Kuva: Jekaterina Bajarkina

IV Suomalaiž-ugrilaižiden kirjutajiden konferencijan aigan mäni “Jugorika”-kirjoiden ozutelusel. Sil tehtihe regionaližen “Jugran kirj – 2026” -konkursan ühthevedoid. “Parahim openduzabukirj” -nominacijas vägestajaks tegihe “Sanu, luge, kirjuta!” -abukirj vepsän kelel, mitte paindihe “Periodika”-painištos.

—“Sanu, luge, kirjuta!” -abukirjan vägestuz om tärged kaiken vepsän rahvahan täht. Se abutab opeta kodikel’t, tradicijoid, kul’turad.  Sen tegemižehe om pandud sur’ armastuz vepsän kel’he, äivoččen radon mahtišt, taht antta kel’t lapsile. Mugoižiden kirjoiden abul vepsän kel’ kulub, kehitoitase i antase toižile sugupol’vile, sanui “Vesän kul’tursebran” pämez’ Larisa Čirkova.

 Abuopenduzkirj vepsän kelel oli tehtud vodel 2024 “Sanu, luge, kirjuta” -projektan aigan, miččen todenzoiti eloho “Vepsän kul’tursebr” Karjalan Valdkundan Pämehen grantoiden tugel. Kirjan avtorad oma vepsän kelen opendajad Kalagespäi Maria da Ol’ga Mironovad. Sihe mülüba grammatine da leksine material, harjoitused da tegendad, a mugažo teksat.

Necil vodel abuopenduzkirj oli udes paindud “Periodika”-painištos. 

Uzišt neciš temas voib lugeda mugažo venäks.

Tarkištele "Oma Median" MAX-kanalad!