Uz’ ozuteluz starinoičeb mecan znamoičendas vepsläižiden elos
Šoutjärven vepsläine etnografine muzei tarjoičeb tedištada enamba vepsläižiden kosketusiš mecanke. Muzejas om avaitud ozuteluz, miččen nimi om “Mec vepsläižiden mifologijas da istorijas”.
Ozutelusel om ühtenzoittud Šoutjärven lespromhozan istorii da vepsläine mifologii. Amuižiš aigoišpäi vepsläižiden elo om sidotud mecha. Sikš ozutelusen tegijad tahtoiba ozutada nenid kinktoid kosketusid erazvuiččiš polišpäi.
— Nügüdehesai rahvaz kaiči tradicijoid, miččed om sidotud mecha. Mö tedam meiden ezitatoilpäi da sirdäm toižele sugupol’vele tedoid siš, kut tariž mända mecha, kut vedäda ičtaze mecas, miše ei segoida i kerata täuded puzud marjoid da babukoid. Mecal om sur’ znamoičend vepsläižiden elos. Vodelpäi 1935 Šoutjärven lespromhozas radoiba vepsläižiden perehiden dinastijad, starinočeb muzejan pämez’ Natalia Anhimova.
Nataljan sanoiden mödhe, ozutelusen avaidusen jäl’ghe ristitud toškanziba muzejaha ičeze arhivoišpäi fotoid, miččiš oma lespromhozan radnikad — heiden heimolaižed.
Ozutelusel mugažo voib kacta taidehpirdajan Jekaterina Kočubejan meckuvid, lugeda kirjutesid vepsläižes mifologijas da panda muštho vepsläižed muštatišed mecas.
“Mec vepsläižiden mifologijas da istorijas” -ozuteluz radaškandeb tulijan voden semendkun lophusai.
