Uvvet fatierat: eläjile annettih avaimet
Belomorskah on nostettu enzimäine luodehes monifatierahine kodi, kudai on luajittu kanzallizen Infrastruktuuru elaigah nähte -projektan mugah. Kezäkuun 26. päivänny tämän koin enzimäzile eläjile annettih avaimet Alovehien kehityksen fondan piälikkö Vasilii Kupizin, Karjalan piämies Artur Parfenčikov da Zakonoinhyväksyndykerähmön deputuattu Irina Kuzičeva. Uuzien fatieroin suajien joukos on erillizen voinuoperatsien yhtynyzien da lapsekkahat perehet, sežo perehet, kudamis on niistiedy.
— Karjal ozuttau ravieloi tempoi programman todevuttamizes. Karjal oli enzimäine aloveh, kudai työndi pakičuksen alovehien kehityksen fondah finansoin suandakse. Vuvves 2019 algajen tazavallas elaigah pädemättömäs fondas muutti parembih ololoih 11 tuhattu hengie. On hävitetty enämbi 200 tuhattu nellikkömetrii avuariikodii, sanoi Vasilii Kupizin Karjalan piämiehen lehtistöpalvelule.
Belomorskan uvves kois on 135 fatierua. Syväinpuoles on luajittu kai ruavot, on olemas santehniekku da sähköplitat. Samah luaduh luajitah kodiloi Karjalan toizisgi kolkis.
Vuvven loppuh suate rakendajat nostetah vie nelli kodii — Pitkäsrandah, Lahdenpohjah, Suojärveh da Petroskoih. Uuzih kodiloih tulou elämäh enämbi 620 perehty.
Petroskois kodii nostetah Belinskoin pihale. Ruadoloi pidäy Karelstroimehanizatsija-laitos. Koin seinät on jo luajittu.
— Kodii nostammo moizis materjualois da konstruktsielois, kudamis luajimmo kodiloi myödäväkse. Yksi-, kaksi- da kolmepertihizis fatierois tiä on eri pinduala, sanoi Karelstroimehanizatsija-laitoksen piälikkö Boris Žadanovskii.
Uvves kois rodieu 251 fatierua.
Vuvvennu 2025 kanzallizen Infrastruktuuru elaigah nähte -projektan mugah uvvet eländytilat sai enämbi 950 perehty.
Yhty Oman Median kanualah MAX:as!
