Uuzi ”Sampo” kuuluu zavodal
Petrozavodskmaš-zavodal sygyzyl suau kuulta Sampo-balietan muuzikkua. Enzi-ildu pietäh 25. syvyskuudu. Enzimäzenny ”Sammon” kuultah laitoksen ruadajat da kučutut gost’at. Balietan enzi-ildu Kirill Simonovan lavastukses ozutetah Karjalan muuzikkuteatras 14.—15. kylmykuudu.
Moine idei juohtui mieleh zavodal ekskursies olduu. Teatran artistat da piäliköt kummastuttih zavodan tiloin suuruttu, zavodan ruadoritmua. Sen nähtyy da kuultuu hyö kehoitettih ozuttua kuulužan Sampo-melličän roindua nygyaigazen tevolližuon nägökulmas.
Balietan muuzikan ezityksekse zavodan tiloih kerätäh suuri joukko: silmfouniiorkestru, hora da solistat-lugijat.
Teatran piälikön Irina Larionovan sanoin mugah, Petrozavodskmaš ongi se samaine nygyaigaine Sampo.
— Mieleh rodieu nähtä, kui ilmanigäine karjalaine legendu yhtyy mašinoin tevolližuon uskomattomah esteetiekkah, kerdoi Irina Larionova Rosatom-laitoksen lehtistöpalvelule.
Kuulužu Sampo-baliettu, kuduan kirjutti Gelmer Rainer Sinisalo, oli ozutettu muuzikkuteatran laval vuvvennu 1959. Teatran repertuarah se kuului enämbän 40 vuottu vuodeh 2001 suate. Vuvvennu 2026 muuzikkuteatru ozuttau balietan uvven versien, muuzikan sih nähte kirjutti moskovalaine säveldäi Jefrem Podgaits. Häi otti omassah partituurah Sinisalon tevoksen tunnetuimbat da tärgevimät aihiet.
Yhty Oman Median kanualah MAX:as!
