Uuttu paikannimie: kummua sanot – nagra et
Kanzallizen da alovehellizen poliitiekan ministerstvan tilois egläi oli pietty vuoronmugaine karjalazien, vepsäläzien da suomelazien edustajien istundo. Täl kerdua paginal oldih meijänkielizet laitoksien nimet da karjalazien kylien kehitys.
— Karjalan, vepsän da suomen kieldy käyttäjes da omile laitoksile nimilöi andajes biznesmiehet puaksuh luajitah hairahtuksii. Se koskou meijän kielien sanoin kirjuttamistu da keksimisty. Erikseh kirjutetah sanoi, kudamii pidäs kirjuttua yhteh — Mua čola. Toiči heil mieleh juohtuu mostu nimie, kudamua ni ole ei meijän kielis — Muama Maaga. Karjalakse se olis Muaman mägi, moine ajatus oli nimen keksijöil, ga kirjutettih sen muga, ga ni ellendiä ei sua, sanoi istundos Jekaterina Zaharova, paikannimilöin tutkii.
Oli tutkijan ezitettylöin nimilöin keskes Hiiden lihas keitetty liemigi.
— Ristikanzu, kudai ellendäy libo maltau meijän kielii onnuako ei äijäl usko moizii kehoituksii da alguhpanoloi, jatkau Zaharova.
Nevvostolazien mieles, biznesmiehile, kuduat turistoin da omien palveluloin käyttäjien kuhkuttamizekse käytetäh karjalua, vepsiä da suomie, pidäy enämbäl kunnivoija meijän kielii da nimilöi andajes kyzyö nevvuo kieliniekoil.
Karjalan ekonoumizen kehityksen varaministru Aleksandr Lomako kerdoi, kui täytetäh federuallizen keskuksen käskylöi tugikohtien kehittämizekse.
— Vuodessah 2030 nämis vallittulois tugikohtis elaijantazo pidäy korrendua 30%, vuodessah 2036 — 60%, sanoi Lomako.
Tugikohtien kehittämizeh kuulutah opastus-, kul’tuuru- da tervehyslaitoksien, tielöin, silloin, vezisistiemoin kohendamine, guazun suandu eländykohtih, lahonnuzien kodiloin eläjien muuttamine uuzih tiloih. Mennyt vuon luajittuloin ruadoloin luvettelus Lomako nimitti Pyhärven kul’tuurutaloin sähkösistieman azettamizen, Kentjärven školan perustehellizen remontan, Vieljärven 989 metrin pitkän vezibutkisistieman kohendamizen da äijät toizet ruavot.
Kaikkiedah Karjalan tugikohtien luvetteluh kuuluu 80 eländysijua.
Yhty Oman Median kanualah MAX:as!
