Uuši tiemerkintä ei anna kulettajalla uinota
Segežan piirissä avattih Kola-tien 36 kilometrin pituni korjattu pätkä. Tie luajittih nykyaikaisemmakši ta turvallisemmakši.
– Tienkorjaukšen aikana oli luajittu šuuri ruato. Tienkorjuajat räjähytettih tien lähellä olijie kallivoja, näin oli parennettu nävyntä. Šen lisäkši hyö vajehettih heikkuo muata tien alla šuopaikoilla, pantih muah 37 uutta vesiputkie ta tien lähellä ašetettih aijokšie ta tiemerkkijä. Niise asfaltilla ašetettih nykyaikani tiemerkintä, kumpani meluou ta värähtelöy, još auto ajau šen piällä, kirjutti omalla VK-šivulla Karjalan piämieš Artur Parfenčikov.
Autokulettajat jo arvoššettih tieuutušta. Uuši tiemerkintä kiinittäy huomijuo ta još kuški šiirtyy tieštä, niin še muissuttau, jotta auto alko ajua pois omalta tiepuolelta eikä anna uinota ajamašša.
Peruškorjauš Kola-tiellä alko vuotena 2018. Šen aikana niise vajehettih viisi vanhua šiltua jokien yli.
