Tämbei lopiše Vepsän kelen nedalin akcii. Necen aigan mäni äi vepsän kelen kaičendaha sidotud azjtegoid erazvuiččiš Karjalan agjoiš. Akcijan jäl’gmäižel päiväl ”Kipinä” vedi urokan Suomalaiž-ugrilaižen školan openikoile.
Urok vedätihe 4.-7. klassoiden openikoile, kudambad opendaba školas vepsän kel’t. Heid om 6 last. Kaiked Petroskoin Suomalaiž-ugrilaižes školas vepsän kel’t opendab 16 mest. Ningoižed akcijad, kut Vepsän kelen nedal’, ozutaba lapsile, miše heiden vepsän kelen tedo om tarbhaine, miše kodikel’t kävutoittas nügüd’ levedas školan irdpolel-ki mugažo.
— Meile om mel’he nece akcii da ühthižrad “Kipinä”-lehtesenke. Lehtest mö lugem vepsän kelen urokoil. Om tärged nähta lehtesen praktikališt pol’t. Lapsed nägištiba nenid ristituid, kudambad keradaba materialad lehtesen täht, tedištiba necen radon polhe, sanub školan vepsän kelen opendai Nadežda Petrova.
Urokal ”Kipinälpäi” lapsed kodviba ičeze tedoid, vändiba vepsläižihe vändoihe, tegiba masatar’-klassan lehtesespäi da paniba muštho erasid uzid sanoid vepsäks.