”Vepsläine sarn”-festival’ tehtas kerdan kahtes vodes. Festivalin ühtnikoiden lugumär kazvab voziden sirttes. Täl kerdal sille oli oigetud 17 videosarnad. Kaiked konkursaha ühtni enamba 200 mest Karjalaspäi, Vologdan da Piterin agjoišpäi. Kaikid penembile ühtnikoile om 5 vot. Täl vodel surel tahtol ühtniba konkursaha aigvoččed-ki ristitud. Kaikid vanhembile konkursan ühtnikoile om 65 vot. Žürijouk valiči vägestajid kudes nominacijas: ”Parahim rahvahan sarn”, “Parahim avtoran ezituz”, ”Parahim naižen rol’”, ”Parahim mužikan rol’”,”Parahim sarn penikaižiden lapsiden keskes”, ”Parahimas vepsän kelen tedos”. Mugažo eriži oli anttud ”specialine lahj” žürijoukuspäi.
- Zavodim vaumitas konkursaha jo sügüz’kus. Tegim ”Pertine”-sarnale toižen lopun. Vändiba siš kaik lapsed päivkodin vanhembas gruppaspäi. Lapsed kaiken aigan ihastusiš ühtneba konkursaha. Surel tahtol hö kävuiba repeticijoile da heredas paniba muštho kaik replikad. Kazvatajad lujas abutiba meile kost’umoiden ecindas da äjas toižes, sanub Maria Mironova, Kalagen školan vepsän kelen opendai (vägestajad ”Parahim sarn penikaižiden lapsiden keskes”-nominacijas).
Vägestajid kaikuččes nominacijas pauklahjoitas. Kaik kollektivad-ühtnikad saba diplomid da muštlahjoid. Tedištada ”Vepsläine-sarn”-festival’-konkursan vägistajiš voib Vkontakte-gruppas. Festivalin tegijad oma ”Periodika”-paindišt i Karjalan Rahvahaližen da regionaližen politikan ministerstv.