Sordavala: uuzi lapsien päivykodi nostetah tänä vuon
Sordavalan piirin opastuslaitoksien rakendamistu da kohendamistu šeikuittih Karjalan tazavallan piämiehen Artur Parfenčikovan piäl al pietyl ruadoistundol. Sordavalan linnah nostetah kaksi opastuslaitostu tazavallan kehityksen vuodessah 2030 federuallizen programman mugah. Paginal ollah 1100-tilahine škola da lapsien päivykodi 150 lapsele. Projektat on luajittu. Uuttu školua ruvetah nostamah vuvvennu 2028, lapsien päivykoin rakendamistu alletah jo tänä vuon. Sih nähte ilmoitti Karjalan tazavallan piämiehen infrastruktuuran kehitykses vastuaju sijahine Viktor Rossipnov.
Sordavalan piiris jatketahgi olemas olijoin školien da päivykodiloin kohendamistu.
— Äijän jo ruattu, ruado jatkuu iellehgi. Mennyt vuon perustehellizesti kohendimmo školan Värtsiläs. Oččuseinien kohendamisruavot loppietah sulakuun loppuh suate. Keviäl-kezäl panemmo aijan ymbäri školas. Kolmen vuvven aloh perustehellizesti kohendammo Sordavalan piirin seiččei školua. Niilöin luvus Haapalammin, Kaalamon, Ruskealan, Tuoksalahten, Helylän školat da Sordavalan linnan školat n:ot 6, 1 da 4, sanoi Karjalan tazavallan piämies Artur Parfenčikov omassah lehtistöpalvelule.
Sordavalas kohendetah lapsien päivykodi n:u 23 da luajitah ”mielevy” voimistelukenty.
Valdivon kannatuksen hyvyös Sordavalan piirih tulou uuttu nuordu ruadajua.
— Mennyt vuon 1. syvyskuudu ruadoh tuli seiččei nuordu spetsialistua. Hyö valmistuttih Petroskoin valdivonyliopistos, Tuulan pedagouguopistos da Petroskoin muuzikkukolledžas, sanoi Karjalan tazavallan opastusministran virras olii Natalja Karmazina. — Artur Parfenčikovan kehoitukses 14 nuordu spetsialistua suadih 100 tuhattu rubl’ua — 10 školan opastajua, kolme lapsien päivykoin ruadajua da yksi ližäopastuksen alal ruadai.
Paiči sidä Sordavalan škola n:u 3 allekirjutti sobimuksen, kuduan mugah opastetah nuordu, kudai opastundan jälles tulou ruadoh sih samazeh školas. Sit školas jo ruadau hiimien da biolougien opastai, kudai sai ruavon Zemskii učitel’ -programman mugah. Saman programman mugah vie nelli spetsialistua — algukluasoin, ven’an kielen da literatuuran da anglien kielen opastastajat — vuvvennu 2024 allettih ruado Sordavalan školis n:ot 4 da 6. Natalja Karmazinan sanoin mugah Zemskii učitel’ -programmu on kyzytty Luadogan rannoin eländykohtis. Vuvvekse 2025 sen mugah huovatah andua ruado viijele opastajale: matemuatiekan, informuatiekan, fiiziekan da ven’an kielen.
Aihies voit lugie suomeksegi.
