Sergei Kisel’ov: Kanšallisprojektien kannatukšen varat kašvetah
Karjalan piämiehen rinnalla toimijan karjalaisien, vepšäläisien ta šuomelaisien etuštajien neuvošton issunto vietettih Karjalan tašavallan halličukšešša. Issunnon piäteemoina oltih kanšallisjärještöjen projektit, Petroskoin Glazunovilla nimitetyn valtijonkonsevatorijan toiminta itämerenšuomelaisien kanšojen musiikkikulttuurin hyväkši ta Karjalan piämiehen rinnalla toimijan šanaštokomiisin toiminta. Tällä kertua issunnon vetäjänä oli Karjalan piäimehen šisäpolitiikan varajohtaja Igor’ Korsakov.
– Etäruavon aikana käsittelimä karjalan ta šuomen kielen opaštamista kouluissa, kielitilannehta Karjalašša ta Kanšainväilisen kieliklubin toimintua. Kaččomatta pandemijah, meilä oli omie tehtävie, korošti Igor’ Jurjevič issuntuo avatešša.
Issunon enšimmäini šeloštaja, Karjalan tašavallan kanšallisen ta alovehellisen politiikan ministeri Sergei Kisel’ov kerto sosialikanšalaisjärještöjen Karjalan kantakanšojen etnokulttuurikehitykšeh liittyjien projektien toteuttamisešta.
– Vuosina 2020–2021 66 kanšalaisjärještyö šai rahakannatušta tilaisukšien toteuttamiseh. Yhtehini summa on 46 miljonie rupl’ua. Niistä 27 projektie ta 18,8 miljonie rupl’ua oli šuunnattu karjalaisien, vepšäläisien ta šuomelaisien etnokulttuurikehitykšeh. Šeuruava Karjalan tašavallan piämiehen grantit -kilpailu on šuunniteltu vuuvven 2022 kolmanteh vuosinellänteheh. Kanšallisprojektien kannatukšen varat kašvetah 100 miljonie rupl’ua šuaten, šano Sergei Viktorovič.
– Issunnošša käsittelimä mukavua kokemušta projektien toteuttamisešša, nimitaulujen kiäntämisen kyšymykšie, a valtijon konservatorijan etuštajat kerrottih perintehellisen musiikkikulttuurin šäilyttämiseštä. On iloista, jotta nykyjäh neuvoštuo vietetäh avoinaisešša muuvvošša ta meilä on mahollisuš käsitellä omie idejoja eläväššä dialogissa, kerto omista vaikutelmista Neuvošton jäšen Oksana Jer’uškina.
Lisyä aihiešta voiti lukie Oma Mua -lehen tulijašša numerošša 29.06.2022.
