Sanelu-2026: livvikse, lyydikse, vienakse da vepsäkse
Perindölline Sanelu-aktsii pietäh tänäpäi Petroskoin valdivonyliopistos seinis. Pido algavuu 11.00 čuasun aigah yliopiston kirjaston suures zualas. Tavan mugah saneluu ruvetah kirjuttamah karjalan kielen livvin, lyydin, vienan murdehil da vepsän kielel.
Tänä vuon täydyy 95 vuottu Brendojevan roindas. Sendäh tämänvuodehizen sanelun tekstakse on vallittu karjalankielizen Vladimir Brendojevan Kylmil-kerdomuksen palaine. Sen valličči da toimitti Petroskoin valdivonyliopiston turistulaitoksen magistrantu Ivan Kalmikov.
— Olen ylen hyväs mieles, ku meil pietäh moizii saneluloi. Äijän kerdua yhtyin pidoh da kirjutin saneluu, tänä vuon minuu kyzyttih lugemah livvinkielisty saneluu. Minule se on suuri vastuolližus. Olen hyväs mieles, ku voin luadie midägi hyödyllisty karjalan kielen kehittämizekse, sanoi Oma Mediale Ivan Kalmikov.
Sanelun tekstu on kiännetty livvin murdehes vienakse, lyydikse da vepsäkse. Sen kiännettih sanelun lugijat. Vienakse saneluu rubieu lugemah Uljana Maksimova, Oma Mua -lehten toimittai da karjalan kielen kursiloin opastai. Lyydikse sanelun kiändi da rubieu sidä lugemah Aleksandra Rodionova, Kielen, literatuuran da histourien instituutan vahnin tiedoruadai. Vepsäkse saneluu rubieu lugemah Marija Šašina, Karjalan TV:n toimittai, vepsän kielen kursiloin opastai.
Yhty Oman Median kanualah MAX:as!
