Ruskeala-vuarapuistoh on ašetettu laulajan neiččyön muistomerkki
Ruskela-vuarapuisto šai laulajan neiččyön muistomerkin. Še henkilöiččöy Karjalan tašavallan piämusiikkitapahtumua, Ruskeala Symphony -festivalie. Avajaisien seremonija mäni merkkifestivalin aikana. Asiešta ilmottau Karjalan tašavallan piämiehen lehistöpalvelu.
Pronššipaččahan luatija on kuvanveštäjä Vitalii Šanov.
— Nyt šiinä kaunehešša paikašša niämmä Karjalan vielä yhen käsin luajitun simvolin šyntymistä. Ajan kuluttuo rupiemma näkömäh Ruskealan neičyttä poštikorttiloissa, vihkosissa ta mainošesittehissä. Šamoin ilmeššytäh pienet veššokšet, kumpasie joka vieraš haluou ottua mukah, jotta muistua festivalie, šano Artur Parfenčikov omalla lehistöpalvelulla.
Festivalin istorija alko oikiešta laulajašta neiččyöštä. Kymmenen vuuvven takaperin työmatan aikana Karjalan piämieš kuuli, kuin neičyt kanšallisešša puvušša laulo kallivojen kešellä. Kuukauven piäštä vuarapuistošša mäni enšimmäini ooperakonsertti.
Aihiešta voit lukie niise šuomekši.
Yhty Oman Median MAX-kanalah!
