Ruškie tori -festivali yhistäy Venäjän kanšoja
Kešäkuun 3.—6. päivinä Moskovašša pietäh Kanšallisen kijallisuon festivali, mi on IX Ruškie tori -kirjafestivalin ošana. Festivalin rajoissa Venäjän eri kanšojen etuštajat esitetäh omua tuotantuo Ruškiella torilla.
Kanšallisen kijallisuon festivalin ohjelma on hyvin monipuolini. Kirjaesittelyjen lisäkši šiinä on seminarija ta luventoja, muasteri-oppija ta konserttija, tapuamisie eri alovehilta tulluijen etnobloggerien ta nuorien runoilijien šekä kanšalliskielisien lapšien aikakaušlehtien toimittajien kera. Ohjelma on šuunnattu kuin aikuhisilla, niin ni lapšilla.
— Festivalin aikana myö šuamma paissa “Harry Potterin” ta “Pienen prinssin” kiäntäjien kera, tiijuššamma mitein hyö kiännetäh muamonkielillä kaikenmoisie “baobabija” ta “asteroidija”. Šamoin festivalin väittelyjen teemojen luvetteloissa ollah kanšalliskieliset meemit ta stikkerit ta niijen luatijat šekä muamonkielini suveniirituotanto ta kanšallisien kulttuurien arvon noštamini. Muasteri-oppien aikana šuamma tietyä muamonkielien opaštamisen metodiikoista, kertou festivalin yksi kurattoriloista Anna Voronkova.
Petroskoin Periodika-kuštantamo kertou festivalissa Kipinä-aikakaušleheštä.
— Mie otan ošua panelikeškušteluh, min aihiena oli kanšalliskielillä julkaistujen lapšien aikakaušlehtien tilanneh Venäjällä. Väittelyh ošallissutah toimittajat Baškirijašta, Dagestanista ta Mordovijašta, šanelou Kipinä-aikakaušlehen toimittaja Maikki Spitsina.
Šen lisäkši Maikki Spitsina viettäy lapšilla muasteri-opin, missä kertou leikkimuuvvošša Karjalašta, šen luonnošta ta kulttuurista. Tapahtumašša häntä auttau Kipinä-kukla.
Kanšallisen kijallisuon festivali vietetäh Venäjän Federatijon Valtijollisen kanšallisen politiikan toteuttamini -valtijonohjelman rajoissa Venäjän digitalisen kehitykšen, yhteyven ta joukkoviessinnän ministerijön kannatukšella.
Aihies voit lugie suomekse da ven'akse.
