Ribatlon: sait kalan – juokse
Belomorskan piiris 22. elokuudu pietäh ribatlon-kilvat, kuduat algavutah 10. 00 čuasun aigah Belomorskan linnas.
— Täl kerdua piettävih kilboih vuotammo läs 100 kilbuniekkua. Vaste nygöi alloimmo registratsien, ga jo tiijämmö, ku tulou rahvastu R’azanin linnaspäi, Murmanskan alovehelpäi, Petroskoispäi, sanoi Oma Mediale Vadim Volkov, Karjalas Ribatlon-kilvoin järjestäi.
Kezäl piettävih ribatlon-kilboih yhtyy yksi kilbuniekku, kudai juoksou da ongittau. Talvel kilbuniekkua on kaksi: yksi hiihtäy, toine ongittau.
Kezäzien ribatlon-kilvoin siännöt ollah kebjiet: jogahizel kilbuniekal pidäy kolme kerdua juosta kilometrin pitkän matkan, kaksi kerdua azettuo sih kohtah, kuduas ongitetah, da suaja kaksi kalua. Kaikkeh sih annetah kaksi čuassuu aigua.
Kilbah yhtymine on ilmaine, voittajat suajah lahjat.
Ribatlon-kilboi pietäh Belomorkan piirin haldivon da Belomorskan Filippovan nimellizen keskiškolan kannatuksel.
Yhty Oman Median kanualah MAX:as!
