Priäžän piirin parahat hyvyönluadijat on ilmoitettu
Tänävuon Priäžän piiris Hyvyönluadii-palkinduo juattih jo nellätty kerdua. Palkičendupido piettih Priäžäs yhteiskunnallizes Art-Selo -rezidentsies. Täl kerdua palkindon suajien joukkoh oli ehoitettu 38 hengie eri Priäžän piirin kylispäi. Enämbi kaikkie nominantua oli Priäžän piirin suurimas Jessoilan kyläkunnaspäi.
Kai ehoitetut rahvas ruatah suurdu ruaduo omis kylis. Kengo kehittäy sportua, kengo ruadau oman kylän kunnostamizekse, kengo auttau mobilizuittuloile saldatoile. On ehoitettuloin joukos karjalan kielen da karjalazen kul’tuuran kehittäjiä, lapsien elostus- da kižakohtien luadijua, murdoloin erillizes keriändäs vastuajua.
— Ylen äijäl miellyttäy se, ku joga vuottu meil on äijy nominantua, on äijy rahvastu, ket ruatah hyvii ruadoloi — yhteiskunnallizii da hyvyönluadijoi. Mennyt vuozi 2022 ei olluh helpo, se oli tuonnuh pahoi uudiziigi, ga kaikkih vaigevuksih kaččomattah rahvas löyttih aigua auttua da kannattua toine tostu, muutettih elaigua omis kylis parembakse. On ongelmua, ga työ etto pie pahua mieldy, etto n’upsistu, kiitti kaikkii palkindon suajakse ehoitettuloi Melliččy-fondan piälikkö Jekaterina Jefremova.
Verkos pietyn iäneständän mugah Priäžän kyläs Hyvyönluadii-palkindon suajakse rodih Vadim Jelisejev jiäkur’oin kehitändäs, Nuožarves — Galina Jelisejeva karjalazen kul’tuuran säilytändäs da kehitändäs, Pyhärves — Aleksandr Pšennikov mobilizuittuloin autandas da lyydin kielen da lyydiläzen kul’tuuran kehitändäs. Vieljärves Hyvyönluadii-palkindon sai Aleksandr Ivanov alallizes hyvyönluadijas ruavos, Čalnas da Jessoilas — oman kylän hyväkse ruadajat Anna Zlobina da Dina Voronova.
Yhteiskunnallizes Art-Selo-rezidencies on pandu kačottavakse Kyläläine-ozuttelu, kudai sanelou Priäžän čupun hyvyönluadijois. Jekaterina Jefremova uskou, ku tämän vuvven loppussah tädä ozutteluu suau suurendua da ezittiä sit tämän vuvven Hyvyönluadii-palkindon ozanottajien hyvii ruadoloi.
