Tämbei, 15. keväz’kud, Venämas zavodihe prezidentan valičused.
— Kahesa časud homendest Karjalas oli avaitud kaik 464 änestuzsijad, kirjuti Karjalan Keskänestuzlaudkund ičeze Vkontakte -lehtpolel.
Täl kerdal prezidentan valičused jatktasoiš koume päiväd. Änestuz lopiše 17. keväz’kud 8 časud ehtad. Koumepäiväine änestuz ei ole uz’ azj Karjalan täht: ezmäižed koumepäiväižed valičused pidetihe Karjalas vodel 2020.
Erased änestajišpäi voiba änestada kodiš. Nene oma invalidoid, pit’kaigaižid läžujid da ristituid, kudambad holduba heiš.
Ku planuitas änestada kodiš, sen polhe pidab tedotada sijaližele änestuzlaudkundale. Tedotuzbumagoid voib oigeta 17. keväz’kun 14:00 časuhusai, tedoti Keskänestuzlaudkund.
Täl kerdal änestajil om voimuz valita prezident online-formatas.
— Karjalas elektronižes änestämižes tedoti 46 108 valičijad, kirjuti Keskänestuzlaudkund.
Änestuzaig om ühtejitte kut internetas, muga i änestuzsijoil: änestada voib 8:00-20:00 časud. Ku änestai om tedotanu elektronižes änestuses, kaiken-se hän voib tulda änestuzsijale-ki. Täl vodel tedoid kanditatoiš Venäman prezitentan sijale voib lugeda karjalaks da vepsäks.
Uzištoid neciš temas voib lugeda mugažo karjalaks da suomeks.