Literaturine “Pohjoižen än’”-konkurs lopihe. Konkursale oli oigetud kirjutesid saamen, neneckijan, sel’kupan, hantin, vepsän da toižil Pohjoižen vähäluguižiden rahvahiden kelil. Konkursan vägestajiden keskes om vepsän rahvahan ezitai-ki – Valeria Sotnikova Petroskoišpäi. Hänen sarn vepsän kelel ”Harav, Vikateh da Hangod-velled” arvostadihe ”Lapsiden literaturtöd kodikelel”-nominacijas.
— Olen ihastusiš, miše minun sarn tuli mel’he žürijoukule. Nece oli minun ezmäine kirjutez. Mamoi abuti käta sarnan vepsäks. En pagiže vepsäks, školas opendan suomen kel’t. Paksus oleskelen minun babanno da dedanno Kalages. Sigä nügüdehesai eläba vepsläižed tradicijad. Žen’a-prababoi starinoičeb äjan enččen elon polhe, kut eliba vepsläižed, miččid radoid tegiba. Naku minun sarnan pähenged-ki oma hänen sarajaspäi, sanub muhaten Valeria Sotnikova.
Literaturižen konkursan ”Pohjoižen än’” vedäb Pohjoižen, Sibirin i Edahaižen Päivnouzman igähižiden vähäluguižiden rahvahiden associacii. Konkursan pätegend om löuta da tugeta avtoroid, kudambad kirjutaba kodikelil ičeze rahvahan elos, kul’turas, veroiš da tradicijoiš.