Petroskoissa Onegan ranta puhaššetah aijoista
Petroskoin piämieš Vladimir L’ubarskii ilmotti Karjalan piäkaupunkin hallinnon šuunnitelmašta puhaštua Onegajärven ranta aijoista ta peruštua šielä yhtehini kävelykatu. Šitä varoin pitäy yhistyä Onegan ta Varkaukšen rantakavut.
— Rannalla olijat aijat häiritäh meijän šuunnitelmie, ne pitäy korjata pois. Myö jo šopima Onežskii zamok -hotellin isännän kera, jotta šen aita šiirretäh loitommakši rannašta, šelitti Vladimir L’ubarskii omalla VK-šivulla.
Viime netälillä suutun piätökšen mukah Fedosovan kavun, 50 isännät korjattih aita, mi häiričči ihmisie kävellä rantua pitin Varkaukšen kavulla.
Nyt Petroskoin hallinto tahtou, jotta omistaja korjuais kahen metrin korkiet gabrodiabazin penkeret, kumpasien takie ei šua läheštyö veteh. Šitä varoin pitäy ratkaissa monieš oikevuš- ta järješšyškyšymyš Karjalan tašavallan tašalla.
Kohta Petroskoin hallinnon jäšenet kačellah Onegan rantakavun kohtaluo ta rahakyšymykšie Karjalan piämiehen Artur Parfenčikovin kera.
