Petroskoin seičeme školad kirjuti municipaližen etapan kodikeliden olimpiadan
Kalevalan päivän Petroskoin Suomalaiž-ugrilaižehe školha kerazihe 8.—11. klassoiden parahimid openikoid kirjutamha olimpiadad suomen, karjalan da vepsän kelil.
Kaiked municipaližen etapan kodikeliden olimpiadan kirjuti Petroskoin 84 openikad, kaks’ heišpäi kirjuti sen vepsän kelel. Nene oma Petroskoin Suomalaiž-ugrilaižen školan openikad kahesandes klassaspäi.
— Olimpiadtöiden tegendad ei olgoi jügedad. Kaiked oli 10 tegendad. Openikoil kodvdihe vepsän kelen grammatikan da vaihišton tedoid, paginmahtoid, starinoiči Suomalaiž-ugrilaižen školan vepsän kelen opendai Nadežda Petrova.
Olimpiadan satusiš voib tedištada jo homen: niid pandas Karjalan Opendusen kehitoitandan keskusen internet-lehtpolele. Municipaližen etapan vägestajad voibištelesoiš kodikeliden tedoiš olimpiadan regionoidenkeskeižes etapas sulakus.
