Petroskoin pikašähköjuna pannah käyntih oraškuušša
Petroskoin kaupunkipiirin sosialitalouvellisella kehitykšellä ommissetušša neuvottelušša Artur Parfenčikov ehotti jatkua tulijan Petroskoin pikašähköjunan reissuo Kontupohjah ta Mäkeh šuaten.
— Još šähköjuna kulkou Kontupohjan ta Mäjen ašemien välissä, Petroskoin aglomeratijo lopullisešti yhistyy sosialitalouvelliseh šolmuh. Pitäy luatie ašemie šuurien mökkikoperatiivien lähellä, jotta ihmiset voitais jiähä šiih ta mukavašti piäššä Petroskoih ruatoh tahi opaššukšeh. Vielä pitäy järještyä autobuššiliikennehta, šano tašavallan piämieš.
Petroskoin viranomaiset šuunnitellah panna käyntih kaupunkin pikašähköjuna kulujan vuuvven oraškuušša. Enšimmäiseššä vaihieššä še rupieu šeisattumah Onežskii-, Golikovka-, Petrozavodsk-Passažirskii- ta Tomitsi -ašemilla.
Šähköjunašša on nellä vaunuo ta 384 paikkua. Enšimmäiseššä vaihiešša šuunnitelman mukah šähköjuna rupieu kulkomah nellä kertua vuorokauvešša: huomenekšella, ennein puolipäivyä ta kakši kertua illalla. Šähkojuna ajau Petroskoista läpi 50 minuutissa. Projektin annettih 200 miljonie rupl’ua Karjalan b’utžetista.
Aihiešta voipi lukie niise livviksi ta šuomekši.
