Petroskoin pegagogini kolledži on valmistan melkein 180 opaštajua
Vuotena 2026 Petroskoin pegagogini kolledžin lopetti melkein 180 spesialistie. Heistä eniten on esikouluopaštajie — 65 henkie, alkukoulun opaštajie — 42 ta liikuntakašvatukšen opaštajie on 38. Asiešta kertou Karjalan tašavallan piämiehen lehistöpalvelu.
Karjalašša šuoritetah toimenpitoja pedagogisen alan ruatajien kannatušta varoin. Esimerkiksi, nuoret spesialistit, kumpaset opaššukšen jälkeh ruatah 1, 2 ta 3 vuotta ta jatetah pedagogista toimintua voijah šuaha 100 000 rupl’an kertamakšu.
— Tänä vuotena Venäjän šivissyšministerijö valmisti opaštajien palkkojen muuvvoštamista koškijie dokumenttija, muun muašša yhenmoiset ehotukšet, kumpaset tultih meijän Mallidokumentin pohjakši. Olemma šitä mieltä, jotta opaštajien palklkojen pitäy olla šelvinä ta läpinäkyjinä, Karjalan tašavallan opaššuš- ta urheiluministeri Natalja Karmazina šano lehistöpalvelulla.
Tänä opaššušvuotena Petroskoin pedagogini kolledži on valmis ottamah yli 170 enšimmäisen kurššin opaštujua. Perintehellisešti korkein kilpailu on Opaštamini alkuluokissa- ta Esikouluopaššuš -šuunnissa.
— Meijän kolledžissa oli äijän käytäntyö: ruatuo lapšien kera, maukavie, tilaisukšie, matkoja ta lapšien muhahukšie, muistelou vuuvven 2026 piäštökäš Al’ona Politova.
Petroskoin pedagogini kolledži jatkau dokumenttien vaštahottuo.
Karjalašša Nuoriso- ta lapšet -kanšallisprojektin rajoissa vuosina 2026—2027 uuvvissetah 20 kouluo. A opaštajilla toimiu Kylän opaštaja -ohjelma.
Aihiešta voit lukie niise vepšäkši.
Yhty Oman Median MAX-kanalah!
