Petroskoin kavuilla löytyy runojen jälkijä
Tänäpiänä, Karjalaisien runojen päivänä Oma Mua -lehen piätoimittaja Natalja Sinitskaja vietti oman enšimmäisen ekskursijon “Karjalan kanšan vanhat runot”. Matkah yhty kahekšan kaupunkilaista, kumpasie kiinnoštau runojen teema.
— Ei joka kanša voi ylpeillä šillä, jotta on antan muailmankulttuurilla eepossan. Meijän runot vuotena 2025 on otettu Venäjän ainehettoman kulttuuriperinnön luvetteloh yheššä jakuttien “Olonhon” kera, korošti Natalja ekskursijon alušša.
Matka alko Elias Lönnrotin puissošta Kalevala-šuihkulähtien luota. Šieltä ryhmä kulki Heponi- ta Ašetamma pistehet A-n piällä -art-objektien ohi (molompien tevokšien luatijana on Vladimir Zorin), Kuklateatterin ta Kanšallisen teatterin šivučči. Kirovin aukivolla kierrokšeh ošallistujat pietyttih Taitomusejon ta Kantele-yhtyvehen talon luona, min jälkeh hyö šuuntauvuttih Puškinin katuo pitin Kanšallisen kirjašton ta Periodika-kuštantamon kyličči. Matan loppupistehekši tuli Karjalan tietokeškuš – eikä šattumalta: juuri šielä, Kielen, kirjallisuon ta istorijan instituutissa ruatah folkloristit ta šäilyy ainutluatuni iänityšarhiiva šekä rakennukšen lähellä voipi ihual’l’a visakoivuo.
— Ekskursijon aikana miun vierahat šuatih tietyä, mintäh juuri 10. kešäkuuta vietetäh Karjalaisien runojen päivyä ta mimmoni oli karjalaini “Harri Potter”, mi olento on vesikoira ta mitein šen luista luajittih enšimmäini kannel, mimmoni on karjalaini reppi ta ken tunnetuista petroskoilaisista šitä esittäy, kerto Natalja Sinitskaja.
Šamoin pakina koški kantelella šoittuo, ta matan ošallistujat šuatih iče kuotella šoittua šillä šoittimella – niin šynty hyvin mukava musiikki.
Ekskursijon vierahien šanojen mukah, kaupunkikävely anto mahollisuon kaččuo uušin šilmin tuttuja petroskoilaisie katuja ta tuntie, kuin šyvällä karjalaiset runot on kuvottu Karjalan piäkaupunkin kulttuurikoodih.
Yhty Oman Median MAX-kanalah!
