Petroskoi ottau vaštah “R’abininien luventoja”
Šyyskuun 12.—15. päivinä Petroskoin eri tiloissa pietäh IX R’abininien luvennot -tietokonferenššie. Tilaisuon ošallistujat käsitelläh Venäjän Pohjosen perintehie ta kulttuurie.
Konferenšših ošallistuu yli 200 tietomieštä Venäjän eri alovehilta ta Japonijašta.
— Konferenšši on tarvittava, tärkie ta aktualini. Še yhistäy eri tietoja ta älyjä šekä putkuau kaunehen venäläisen šanan muailmah. Mitä enemmän on šemmosie tilaisukšie, šitä lujemmin ušomma šiih, jotta Karjalan ta koko Venäjän tieto kehittyy oikieh šuuntah, korošti Karjalan tašavallan halličukšen piäministerin šijahini Larisa Podsadnik plenarikokoukšešša.
”R’abininien luventoja” vietetäh Itämerenšuomelaisien kanšojen liigan Opaššuš — valo: kehitykšen pohja -projektin rajoissa Karjalan tašavallan piämiehien granttišiätijön kannatukšella.
Konferenššissa käsitelläh istorijua, etnografijua, folkloristiikkua, kielitietuo, arhitektuurie, taituo, ikonimualautta, musiikkie, kulttuuriperinnön šäilyttämistä ta muita aiheita.
”R’abininien luventoja” pietäh Kiži-musejon alottehista vuuvvešta 1991 kerta nelläššä vuuvvešša.
