Petroskoi ottau vaštah “Bubrihin luventoja”
Šajekuun 26.—27. päivinä Venäjän tietoakatemijan Karjalan tietokeškukšen Kielen, kirjallisuon ta istorijan instituutissa pietäh XIX Bubrihin luvennot -tietokonferenššie. Tilaisuon aihiena on “Kielet ta kulttuurit digitalisoinnin aikana”.
Konferenšših ošallistuu asientuntijie, tietomiehie, opaštajie ta yläoppilahie Karjalašta, Moskovašta, Piiteristä, Jekaterinburgista, ta Siktivkarista.
— Tämän vuuvven konferenššiksi oli valmissettu šähköresurssi, kumpasešša on Dmitrii Bubrihin elämäkerta šekä kaikkien iellisien konferenššien ohjelmat ta materialit. Niistä näkyy, jotta mielenkiinto digitalisih teknologijoih kašvau. Näin, konferenššin teema ei ole šattumaini. Enši kertua konferenšših ei ošallissu ulkomaisie tietomiehie, ka šaima hyvän vaštuun Venäjän tärkeimmistä tietokeškuksista, šano Kielen, kirjallisuon ta istorijan instituutin johtaja Ol’ga Il’uha.
— Nykyjäh koulutuš on digitalisen muuttumisen vaihiešša, a Bubrihin luvennon -konferenšši näyttäy, jotta kanšallisien kielien opaštamini ta tutkimini on tapahtumien keškipisteheššä, korošti Petroskoin valtijonyliopiston Filologijan instituutin johtaja Oksana Abramova.
Konferenššissa käsitelläh digitalisie kokomukšie, tietokantaohjelmie, šähköšanakirjoja, kielikorpussija, uušie tutkimis- ta opaštamiskeinoja ta muita nykytärkeitä kyšymykšie.
