Petroskoiš mäneba vanhveroižen uskondan kul’turale omištadud azjtegod
28.—29. sügüz’kud Karjalan Rahvahaližes muzejas mäneba “Vigan literatur da kul’tur: “Pomorskije otveti”-kirjan 300-voččeks päiväks”-lugendad. Ühtnemaha azjtegoho ičeze dokladoidenke tuliba vanhveroižen uskondan kul’turan oppijad Moskvaspäi, Piterišpäi, Velikii Novgorodaspäi da Petroskoišpäi.
Lugendoiden ezmäižel päiväl muzejas mugažo avaitihe “Благоволи читати отвѣты наши…”-ozuteluz, miččel om ezitadud unikaližid käzil kirjutadud kirjoid, jumalaižid, toižid vanhveroižen uskondan kul’turan kaluid, azjbumagoid da fotoid muzejan da tetaban keradajan Maksim Maksimovan personaližiš keradamištoišpäi.
— Kaikutte vanhveroižele uskondale omištadud ozuteluz om todesine praznik oppijoiden da muzejiden radnikoiden täht, sikš ku nece tem hot’om jüged, no lujas melentartuine. Olen ihastusiš, miše muzejile udes pördihe melentartuz’ vanhveroižen uskondan kul’turaha, sanui azjtegon ühtnik, Kunstkameran tedosekretar’ Denis Jermolin.
Lugendoiden toižel päiväl ühtnikad lähteba Medvežjegorskan rajonan Danilovo-külähä da Ber’ozovkaha — vanhveroižen uskondan kul’turan tahoile.
