Perindöllizien syömizien kerävömatkat jatkutah – Puudogan randu
Karel’skaja kuhn’a i točka -projektan kerävömatkat jatkutah. Vaste vai projektan ruadojoukko tuli Puudogan rannalpäi. Sie olles projektah kuulujat yhtyttih Puudogan matikku -festivualih, kudai piettih Kuganavolok-kyläs.
— Juuri se oligi meijän piätarkoitus. Tahtoimmo nähtä da oppie sen rannan kalahizii syömizii. Festivualih yhtyi enämbi 300 kalastajua. Vodlajärven rannan eläjät väitetäh, buitegu heil ollah omat syömizien keitändytavat. Sanommo, kalakurniekat heil ollah eri muoduo sen mugah, mittumua kalua on sydämes: kalakurniekku riäpöin kel luajitah piduličču kui meil, kuhan kel — nellikolkaine, pehoin kel — pyöryžy. Da ku Vodlajärvel katliettoi luajitah havvis, Puudogas — matikas, sanoi Oma Mediale projektan piälikkö Anna Anhimova.
Projektalazet iče aktiivizesti yhtyttih festivualih. Anna Anhimova opasti lapsile, kui luadie tönčoidy, P’otr Parfenov ozutti omua käzineruo — puuluzikoin - da astieloin luajindua, Margarita Kemppainen ezitti omii tyttilöi karjalazis ruutis.
Projektan rahvas käydih Avdejevoh, kus heidy syötettih hirven lihal keitetyl gribarokal.
— Puudogan linnas Tatjana Medvedeva ozutti meile sigäläzii näppipiirualoi, hos hyö niidy ei ni yhtistetä meijän luaduh, sendäh heil ei ni ole nenii ”näppilöi”. Rugehizes jauhos hyö ajeltah aiga sangiet kuoret, rannat kudamis luajitah hoikembat. Keskele pannah syväimet, sit muite vai nostetah agjat, rounoku morfat. Piiruat roitah kui keksat rouno, sanou Anna Anhimova.
Puutui projektalazil oppie kuulužua matikkurokkua da Rimma Krapivinan manasterinpannus pastettuu leibiä.
Suuren pyhän aigah ruadomatkah käynyöt puututtih Puudogan kirikköh sluužbale da opittih sigäläzii perindöllizii argisyömizii.
Yhty Oman Median kanualah Telegramas!
