”Periodika”-paindišt tegeb jumoristižen videožurnalan rahvahaližil kelil. (6+)
Sen nimi om ”Kuki-rikku”, videožurnalaha mülüb kuz’ videorolikad vepsän kelel da karajalan kelen kahtel paginal. Jumoristižiden rolikoiden pähenged oma Petroskoin Suomalaiž-ugrilaižen školan 1.-4.-klassoiden openikad.
– Kaik navediba ilosižid. Meletam, miše ilosižiden abul opeta kel’t om melentartušt. Toivom, miše mugoine kodikeliden opendamižen format kingitab lapsiden homaičust. Paiči sidä, ningoižed videorolikad voiba olda ližamaterialan opendajiden täht urokoil, sanub videožurnalan sjomkoiden ladii Maria Šašina.
Edel sjomkoid lapsiden täht pidetas mastar’-klassoid. Tegeb niid Karjalan Rahvahaližen teatran akt’or Andrei Gorškov.
– Meil mäni jo ezmäine vastuz lapsidenke. Se ozuti, miše lapsed oma lujas aktivižed, heil om sur’ taht ühtneda sjomkoihe, sanub hän.
”Kuki-rikku”-videožurnal kuvatas Karjalan Rahvahaližen da regionaližen politikan ministerstvan raha-abul, subsidijale, mitte anttas Karjalaižiden, vepsläižiden da suomalaižiden mediakeskusen kehitoitandale. Videorolikad planuitas tehta jo necen voden lopuks.