Kanšallisešša kirjaštošša ilmotettih Karjalan vuuvven paraš kirja -kilpailun tulokšet. Tašavallan vuuvven 2022 parahakši kirjakši valittih Periodika-kuštantamon julkaisoma Pedri, kuulužu kuningas -kirja.
– Kokomuš pohjautuu Karjalan tietokeškukšen tietoarhiivašša šäilyjih lähteih ta julkassettuih šuomelaisih ta venäläisih painokših, kerto kirjan luatija, Venäjän tietoakatemijan Karjalan tietokeškukšen Kielen, kirjallisuon ta istorijan instituutin vanhempi tietomieš Valentina Mironova.
Kirja on omissettu Pietari Šuuren 350-vuotisjuhlalla. Šiinä on kolme ošua: istorijallisie runoja, starinoja ta taruja Pietari Šuurešta karjalan ta venäjän kielellä.
— Karjalan tašavallan kanšallisen ta alovehellisen politiikan ministerijön miäräykšen mukah meijän piti valmistua painoš Pietari Šuuren 350-vuotisjuhlakši. Ilmešty kyšymyš, onko karjalankieliseššä perinteheššä Pietarilla omissettuja tekstijä. Mie tiesin, jotta eeppiset runot Petari Šuurešta oltih olomašša. Lyhyöššä ajašša kerätty ainehisto on esitetty kokomukšešša, kerto Mironova.
Tänä vuotena Vuuvven paraš kirja -kilpailuh ošallistu 50 painošta. Kilpailun komiisi valičči voittajie kuuvvešša nominatijošša šekä Vuuvven parahan kirjan. Lisäkši seremonijašša myönnettih lahjoja ta diplomija erikoisnominatijoissa.
Pedri, kuulužu kuningas -kirja niise voitti Karelija=Karjala-, Paraš lapšienkirja- ta Lukie uuvveštah -nominatijoissa. Kirjan kuvittajana on piiteriläini taiteilija Lidija Žukova.
Aihiešta voit lukie niise šuomekši ta venäjäkši.