Pedagogi Karjalašta ottau ošua koko Venäjän kilpailuh
Tämän vuuvven kevyällä Petroskoin Lumikello-päiväkojin kašvattaja Svetlana Kobeleva voitti Vuuvven kašvattaja 2023 -kilpailun Muamonkielen opaštamiseh oikeutettu kašvattaja -nominatijošša.
Nyt Svetlana Aleksandrovna esittäy Karjalua Venäjän ammattikilpailušša “Paraš muamonkielen ta -kirjallisuon opaštaja 2023” Parahat praktiikat, mit kehitetäh päiväkotien kašvattajien muamonkielen taituo -nominatijošša.
Tänä vuotena kilpailun lopputoimenpivot vietetäh 18.—23. šyyškuuta Karačajevo-Čerkesijan tašavallan Čerkessk-kaupunkissa opaštajilla ta Pohjosen Osetijan tašavallan Vladikavkazissa kašvattajilla.
Šyyškuun 20. päivänä piettih enšimmäini kilpailu-tehtävä — pedagogini toimenpito lapšien kera.
— Mie järješšin lapšilla mukavan matan karjalaiseh meččäh, opaššin heitä šoittamah kannel-šoittimella, värjyämäh šyyšlehtijä ta kerroin, mitein šanuo eri värijä šuomen kielellä, kerto omašta tunnista lapšien kera Svetlana Kobeleva.
Šyyškuun 20.—22. päivinä vietetäh rahvahan online iäneštämistä “Paraš pedagogini toimenpito kašvattien kera” kilpailun ošallistujien — kašvattajien kešen. Šie voit kannattua Karjalan kašvattajua Svetlana Kobelevua. Iäneštyä voit 22. šyyškuuta 17.59 aikah šuaten. Iäneštämistä pietäh kilpailun virallisešša VK-ryhmäššä.
Aihiešta voit lukie niise šuomekši.
