Part Anna Lisicinan muštoks
Gerojan part – nece om projekt, mitte radab Venämal jo erasid vozid. Kaiked Karjalas om koume mugošt partad. Petroskoin školas nomer ühesa om part, miččel om Vladimir Pčelincevan nimi, a Karjalan kadetoiden korpusas om part Aleksandr Kalininan nimel. Nügüd’ Änižröunan Kalag’-külän školas-ki om part Sovetskijan Sojuzan gerojan nimel. Se om omištadud Anna Lisicinale.
Partal om gerojan foto, sid’-žo om kirjutadud hänen elon polhe da hänen sures tegos.
— Ei kaikuččes posadas oliba Sovetskijan Sojuzan gerojad. Kalages, kacmata sihe, miše nece om pen’ posad, oli mugoine geroi. Meletan, miše Kalagen školas da toižiš vepsläižiš školiš kaik oma korktad mel’t Anna Lisicinas, ülendasoiš, miše hän sündui necil mal, miše hän oli vepsläižen. Mušt Anna Lisicinan polhe eläb i eläškandeb igän, sanui Zakonsädajiden suiman varapämez’ Ol’ga Šmajenik.
Kalagen školan pämehen Svetlana Gotičan sanoiden mödhe, partan taga ištuškandeba parahimad školan openikad. Tal vodel mugoižen voimusen andaba vanhembiden klassoiden openikoile, kudambad voiba sada kuldaižed medalid.
