8.—9. šajekuuta Vuokkiniemeššä pietäh mujehfestivali. Kalaštajien joukot ruvetah kilpailomah mujehen šuamisešša, šen puhaštamisešša ta mähnän lypšännäššä.
Festivalin keškipäivänä on 9. šajekuuta. Šilloin kilpailijilla ta kylän vierahilla järješšetäh šykšyn kalaštamisen pruasniekka.
On kučuttu äijän vierahie a konserttiohjelma alkau tašan puolipäivänä. Pruasniekašša esiinnytäh tanšši- ta lauluryhmät Koštamukšešta šekä tulou ILMU-musiikkiryhmä, še tulou pruasniekan korukši.
— Erikoista huomijuo annamma ruuvvalla, šentäh kun festivalih on kučuttu Venäjän ruokakartta -projektin johtaja Jekaterina Šapovalova. Hiän tulou kuvaušryhmän kera, jotta luatie filmi mujehešta. Još meijän pohjoiskala tulou projektin ruatajilla mavun mukah niin Vuokkiniemi tulou ruokakartan pistehekši, šelitetäh festivalin järještäjät.
Niise pruasniekan järještäjät koroššetah, jotta Vuokkiniemeh Koštamukšešta ruvetah kulkomah buššit. Niin jokahisella on mahollisuš ošallistuo pruasniekkah ta tuttavuštuo kalaštamisen ta kalaruuvvan luatimisen perintehih.