Šoutjärves varastadas adivoid ”Pajokeraine”-festivalile
Redukun 29. päiväl Šoutjärven školas mäneb ”Pajokeraine”-festival’. Täl kerdal pajod, kargud da vändod om omištadud kodirandale da penele kodimale.
— Festival’ abutab ühtenzoitta lapsiden kollektivoid kaikiš agjoišpäi, kus eläba vepsläižed. Openikad, kudambad opendaba kodikel’t, voiba pagišta vepsäks, heiden täht nece om hüvä praktik. Festival’ abutab kaita, kehitoitta i popul’arizoitta vepsän rahvahan fol’klorad, tradicijoid da veroid, sanui Šoutjärven školan pämez’ Natalja Bikova.
”Pajokeraine”-festival’ tuli jo hüväks tradicijaks Šoutjärves. Lapsed päivkodišpäi da školišpäi ozutaba hüvid kodikelen tedoid da sädoimahtoid.
— Kaikuččen vodenke melentartuz’ festivalihe kazvab. Täl vodel sihe ühtneba lapsiden kollektivad Änižröunan kaikiš vepsläižiš školišpäi, mugažo kollektivad Vologdan agjan Babajevon rajonaspäi i ”Kantele”-ansambl’an norištstudii, ližazi Natlja Bikova.
Pajofestival’ tehtas Vepsän kul’turan vodel Karjalan Rahvahaližen da regionaližen politikan ministerstvan tugele.
