Orlan-rel’ssabušši ei rupieu šeisattumah Lietmajärveššä
Vuuvvešta 2023 Koštamukšešta Kemih voipi piäššä Orlan-rel’ssabuššilla. Luotehisen paikallisen matkuajayhtijön varapiäjohtaja Aleksandr Grigorjev kerto Orlanien liikentehen aikataulušta ta šelitti, miksi šeisatuš Lietmajärveššä on mahotoin, kertou 64.parallel-verkkojulkaisu.
— Olemma šuanun Luotehisen paikallisen matkuajayhtijön varapiäjohtaja Aleksandr Grigorjevin allakirjuttaman vaštaukšen. Hiän vaštasi, jotta paikallisjunat ruvetah kulkomah 1. oraškuuta—30. šyyškuuta. Kemistä Koštamukšeh rel’ssabušši lähtöy joka nelläšpäivä, piätinččä, šuovatta ta pyhäpäivä. Koštamukšešta Kemih — joka piätinččä, šuovatta, pyhäpäivä ta enšiarki, lainuau 64.parallel Aleksandr Grigorjevin šanoja.
Täh aikah šeisatuš Lietmajärveššä on mahotoin.
— Ei ole teknillistä mahollisutta muuttua niijen junien liikkehen aikatauluo. Rautatieinfrastruktuurin ruavon erityisluatu ei anna šitä. Rautatiellä on šemmosie ošie, missä on vain yksi rata, ta ne vuajitah tarkkua aikatauluo. Šamoin još aikataulu muuttuu, RA-3-rel’ssabuššin liikentehen aikataulu rikkoutuu, šelitti Aleksandr Grigorjev 64.parallel-verkkojulkaisulla.
Aihiešta voit lukie niise šuomekši.
Yhty Oman Median MAX-kanalah!
