Onegajärven rantakatuo pijennetäh ta kunnoššetah
Karjalan piämieš Artur Parfenčikov ta Petroskoin kaupunkipiirin johtaja Vladimir L’ubarskii työneuvottelun aikana kačeltih Petroskoin simvolin kehittämisšuunnitelmie. Onegajärven rantakatuo pijennetäh ta yhissetäh Varkaukšen rantakatuh.
Petroskoin hallinto tarkašti alovehta pitin Onegajärvie. Jotta toteuttua šuuri projekti ta pijentyä rantakatu pitäy piäššä šopuh 39 tonttimuan omistajien ta vuokruajien kera. Ne tonttimuat haitetah yhtehisen kävelyalovehen luatimista.
Konseptijon ta projektidokumenttien valmissukšeh kaupunki tarviččou lisyä rahotušta.
– Mieleštäni, kaikki petroskoilaiset hyväkšytäh, jotta rantakatuo myöten vois kävellä koko kaupunkie pitin. Tärkeintä on še, jotta ruato tällä šuunnalla on jo alkan. Myö ehottomašti kannatamma kaupunkie: rupiemma šopimah varattujen tonttimaijen vapauttamisešta ta annamma rahavaroja, korošti Artur Parfenčikov.
Karjalan piämieš tarkašti kunnoštamistöijen kulkuo Levašovskin kävelykujalla. Šuunnitelman mukah šielä piällyššetäh kulkijatietä rantakavušta Dzeržinskin katuh šuaten, uuvvissetah nurmikkuo, issutetah niinipuun 200 taimenta, vajehetah lamppuja ta ašetetah lisävalotušpylväkšie.
Lisäkši Artur Parfenčikov ta Vladimir L’ubarskii tarkissettih Rantapuistuo Varkaukšen rantakavulla. Šielä kohennetah lašku, ašetetah valotušpaččahie ta kunnoššetah lepoaloveh vejen luona. Työt on lopetettava vuuvven 2023 šyyškuun loppuh šuaten.
Aihiešta voit lukie niise šuomekši.
