Karjalan tašavallan Rospotrebnadzorin virašton tietojen mukah täh aikah kaikista otetuista koittehista on tovissettu 34 omikrontapahušta.
Läsiytynyijen luvušša on kahekšan lašta ta 26 aikuhista. Kaikki potilahat on erottettu. Hyö voijah hyvin. Heilä on lievie simptomija.
– Omikron ušein pahoin vaikuttau lapših, kumpasista monet läsitäh jykiešti. Tartuntahini on varmašti lievempi, ka korkiemman tarttuvuon takie kuolovaisuon statistiikka voit olla šama kuin Delta-variantin tapahukšešša. Omikron-muunnokšen huippukohta Karjalašša on vuotettava pakkaiskuun lopušša, kirjuttau Karjalan tašavallan tervehyšministeri Mihail Ohlopkov omalla Vkontakte-tilillä.
Ohlopkov koroštau, jotta omikron leviey tosi ruttoh ta muissuttau šuojelutoimenpitoloista: oikieaikasešta ruvettamisešta, desinfionnista, kontaktien vähentämiseštä ta huonehien tuulettamisešta.