Om vahvištadud uz’ vadkundaližen rahvahaližen politikan strategii
Venäman prezident Vladimir Putin allekirjuti käskön, mitte koskeb udištadud valdkundaližen rahvahaližen politikan strategijad. Azjbumag tuleb valdaha voden 20261. vilukud da ozutab, kut Venäman rahvahaline politik kehitoitase 2035. vodehesai. Udes strategijas om ozutadud, kut valdmehile tariž rata rahvahidenkeskeižiden kosketusiden polel, tedotadas Karjalan rahvahaližen da regionaližen politikan ministerstvan VKontakte-lehtpolel.
Azjbumagan mödhe, politikan pätegend om Venäman äirahvahaližen rahvazkundan ühtmuden vahvištoituz da kul’turiden i keliden äipoližuden kaičend.
— Tugen täuzin necidä strategijad. Udes azjbumagas kuvastadas meiden äirahvahaližen man nügüd’laižed olod da ozutadas aktualižed problemad i tegendad. Strategijan todenzoitamine andab Venämale kehitoittas da parembzuda, sanui Sergei Kisel’ov, Karjalan rahvahaližen da regionaližen politikan ministr.
Politikan pohjaze om pandud se, miše Venäman rahvahanikoil om kohtaižid oiktusid da valdoid i miše kaikil rahvahil om kohtaižid voimusid kehitoitusen täht. Mugažo Venäman igähižil vähäluguižil rahvahil om garantiruitud oiktusid; ei sa ahtištoitta mehid heiden rahvahaližuden, uskondan vai ristitrodun taguiči.
Uzišt neciš temas voib lugeda mugažo karjalaks da suomeks.
Tarkištele "Oma Median" Telegram-kanalad!
