Ol’ga Šmajenik tariči ližata rahatuged vepsläižile
Karjalan Zakonoiden tegendan deputat Ol’ga Šmajenik ezini Salehardas “Parlamentarijoiden dialog” -forumal. Hänen doklad oli omištadud vepsläižile da sille, kut Venämal tugetas necidä igähišt vähälugušt rahvahad. Siš tedotab Karjalan Zakonoiden tegendan kundan prezz-služb oficialižel VKontakte-lehtpolel.
Sur’t homaičust deputat kingiti vepsän rahvahan kul’turan da kelen kaičendaha, vepsläižiden eländtahoiden socialiž-ekonomižehe kehitoitandaha, tradicionaližen elonladun tugehe.
Ol’ga Šmajenikan sanoiden mödhe, Karjala sab federaližes büdžetaspäi rahatugen, miččen pala oigetas vepsläižiden socialižehe da ekonomižehe kehitoitandaha. Jäl’gmäižes vides vodes rahatugi oli kaiked 15,7 millionad rubl’ad.
— Rahatugi andoi voimusen todenzoitta erazvuiččid projektoid: tehta etnokul’turižid parkoid, tugeta vepsläižiden küliden tradicionališt elomištod, azotada eländtahoiš kaks’keližid znamoid, vedäda vepsän kelen kursid aigvoččile. Kaikuččel vodel pidetas tradicionaližed vepsläižed praznikad: “Kalarand”, “Elon pu”, “Pühä päiväine” da toižed, sanutas tedotuses Karjalan Zakonoiden tegendan kundan lehtpolel.
Deputat starinoiči foruman ühtnikoile siš, miše vodelpäi 2024 rahatugi vepsläižile peneneb. Hän tariči ližata sidä, tehta voden 2023 rahatugen surččeks — nece abutab kehitoitta vepsläižiden tradicionaližiden eländtahoid.
Uzišt neciš temas voib lugeda mugažo karjalaks.
Tarkištele "Oma Median" MAX-kanalad!
