Nuožarveh suadih uuttu muzeivehkehty
Priäžän lohkol Nuožarven kyläs olijah ainavoluaduzeh muzeih ”taivahan al” suadih kaksi uuttu ozutusvehkehty, kuduat löyttih Kuudaman kyläs: vahnanaigaine kuutti, kuduan löyttih paikallizet lapset, da venehen emäpuu, kuduan muzeih lahjoitti eräs mies.
Muzein alguhpanii Vladimir Neronov on ihastuksis:
— Se on tovelline kummu, konzu moizet kallehet vehkehet puututah muzeih. Kiitän kaikkii, ket oldih eččoruadolois, ket autettih ehättiä niilöi vehkehii da muite kannatettih hyväl sanal, sanoi Oma Mediale Neronov.
Ku kuuttii voidas nähtä tuliet sugupolvet, se pidäy konserviiruija. Enzimäi vahnu kuutti pannah vedeh, talvel se kylläl kylmäy – se on vältämätöi ehto, ku puudu ei rikkos jällespäi päivypasto. Vahnua emäpuudu muzeih tulluot voijah nähtä jo lähi aigua.
Nuožarven muzei on erinomaine kohtu. Se nostettih nuagloittah da avattih kezäl vuvvennu 2025 Melliččy-fondan kannatuksel da paikallizien abuniekoin hyvyös. Nygöi muzeis voibi nähtä perindöllizii ennevahnazii karjalazii hongoloi da Petroskoin valdivonyliopiston opastujien Pedri-kuningahan aigahizien piirustuksien mugah luajittuu venehty. Täh muzein tullah net, ket arvostetah histouriedu da oman rannan neroniekoin maltuo.
Yhty Oman Median kanualah MAX:as!
