Nina Zaiceva starinoiči ičeze vepsläižes ozas
“Periodika”-painištos mäni “Minun vepsläine oza” -kirjan prezentacii. Azjtegole tuliba avtoran tutabad, sebranikad, hänen sädandradon navedijad, kirjan tegijad.
“Minun vepsläine oza” -kirjan prezentacijad Petroskoiš varastadihe surel tahtol. Kirj läksi eloho jo necen voden kevädel. Lopuks, azjtego oli märitud elokun 7. päiväks. Prezentacijale tuliba avtoran tutabad, sebranikad, hänen sädandradon navedijad, kirjan tegijad.
— Prozad om jügedamb kirjutada, mi runotust. No prozan abul kel’ kehitoitase enamba. Ližaks, prozan kal’t voib paremba ozutada rahvahan elon filosofijad.
Kirjan pohjaze om pandud minun elon istorijoid. Tahtoin ozutada vepsän rahvahan tradicijoid da veroid. Lugen ičtain ozakahaks ristituks. Ved’ se, midä minä olen tehnu, kus minä olen radanu tozi om-ki minun vepsläine oza, sanui Nina Zaiceva.
Lugeda kirjad voib kaikutte tahtnik, siks ku se om kirjutadud kahtel kelel: vepsän da venän kelel. Kuvad kirjan täht tegi “Kodima”-lehtesen toimitai da taidehpirdai Darja Hil’.
—Om arvokast, miše minei taritihe tehta kuvad necen kirjan täht. Minei oli lujas tärged rata ühtes Nina Grigorjevnanke, tundištadas hänenke lähemba, sanui Darja.
Kirjan avtor toivoti tehta prezentacijad vepsläižiš küliš-ki. Sigälaižed eläjad mugažo lujas varastaba necidä aigtegod.
