Nimitadihe parahimid kodikelen tundijoid
Kaikuččel vodel sulakus Karjalan opendusen kehitoituzinstitut tegeb kodikeliden regionaližen olimpiadan, miččehe ühtneba školan openikad, miše kodvda ičeze mahtoid karjalan, vepsän da suomen kelen tedoiš. Täl kerdal olimpiad mäni online-formatas. Sihe ühtni 139 openikad kahesas Karjalan rajonaspäi, a mugažo Piterin agjan Podporožjen rajonaspäi.
— Tuli mel’he, kut lapsed kirjutiba olimpiadtöid. Jäl’gmäižes tegendas vanhembile lapsile pidi pagištoitta Kalevalan heng. Kaik hüvin tegiba necen tegendan. Nägui, miše lapsed tedaba hüvin ei vaiše kel’t, no Kalevalan tekstad-ki, sanui žurijoukun ühtnik Ol’ga Žukova.
Vepsän kelen tundijoid oli kaiken 24 mest. Nene oliba lapsed Kalagespäi, Šoutjärvespäi, Šokšuspäi, Petroskoišpäi da Vidlaspäi. Vepsän kelen olimpiadaha ühtniba 4.-5. klassan i 9.-11. klassan openikad. Tegendad oliba ani erazvuiččed i lujas melentartuižed. Kodvdihe lapsiden tedoid grammatikas, leksikan tedoid da kirjutandmahtoid.
Olimpiadan satusid voib kacta täs.
