Nellä tuhatta abiturienttie työnti anomukšet Petroskoin valtijoyliopistoh
Heinäkuun 25. päivänä Petroskoin valtijoyliopistošša piätty dokumenttien vaštahotto. Pakalauri- ta erikoistuomisohmelmih ilmottautu 4166 abiturienttie, ilmottau Stolitsa na Onego -verkkojulkaisu viitaten yliopiston tietoh.
— Tänä vuotena šuosituimpana alana b’utžettišuunnista on Sosiologija Istorijan, poliittisien ta sosialisien tietojen instituutissa. Kilpailu oli 28 henkie paikalla. Šamoin kyšyttynä on Tiijon muokkaukšen ta johtamisen sistemi Fiisis-teknilliseššä instituutissa — 17,44 henkie paikalla. Johtajien alojen luvettelon lopušša on Muankäyttöjärješšyš Biologijan, ekologijan ta agroteknologijien instituutissa — 17,33 henkie paikalla, verkkojulkaisu kertou.
Petroskoin valtijoyliopiston tietojen mukah numerot ei olla tarkkoja, šentäh kun abiturientit voijah ottua pois anomukšie. Lopputiijot ilmeššytäh elokuušša.
Petroskoin valtijoyliopistoh tuli anomukšie Moskovašta, Jaroslavlista, Piiteristä, Murmanskista, Mončgorskista, Arhanhelista, Kurskista, Kazanista, Orenburgista, Ussuriiskista ta muista kaupunkiloista. Kaikkieh tänä vuotena b’utžettipaikkoih otetah vaštah 1471 henkie. Magisterija varoin on annettu 139 paikkua, ta on työnnetty yli 500 anomušta.
Aihiešta voit lukie niise šuomekši.
Yhty Oman Median kanualah MAX:as!
