Joga voden Šoutjärven muzei ühtneb ”Muzejiden ö”-akcijaha. Necil kerdal se linneb pätničan 20. semendkud. Muzejan radnikad vaumičeba melentartuižen programman adivoiden täht. Programmaha mülüba kut maksuližed, muga maksutomad azjtegod. Adivoiden täht linneba ekskursii muzejadme, kvest, interaktivine vänd, vastused melentartuižidenke ristituidenke, mastar’-klassad, miččil adivoil linneb voimuz tundištadas sijaližidenke mastaridenke i opetas tehmaha midä-se ičeze käzil.
— Mö varastam adivoid meiden muzejas. Programmas linneb kanzkvest külädme ”Mäne i tunde!” Jouk jo keradase, miše ühtneda kvestaha, pidab kirjutadas aigvodhe. Se linneb mel’he kut aigvoččile, muga lapsile-ki. Lapsiden täht tehtas openduzčas todesižes aitas, kus hö tedištaba manradon polhe, tradicionaližes vepsläžiden rados. Mugažo muzejas i irdal linneba fotosijad, kus kaik tulijad voiba tehta čomid fotokuvid, sanub muzejan radnik L’ubov’ Ivanova.
Muzei zavodib rata viž časud ehtad. Ehtal tanhal linneb praznikkoncert, miččele kuctihe sijaližid sädaikollektivoid. Kaikil tulijoil adivoil lineb voimuz ozutada ičeze lahjavut scenal: pajatada, kargaita vai lugeda runon. Tarkašti programman polhe voib lugeda täs.